شعر: أبو السعود محمد
وسط البلد
وسط البلد والفترينات
رفوف كتير
ووشوش بنات شفايفها روج
دلع بيرقص على الرصيف
وقلوب بتستجدي الرغيف
في يوم غتيت ويوم ظريف
وإشارة بايظة للخروج م المتروهات
وكلاكس بيصحي الغضب
واتوبيس بيشحن الغلابة
م التعب..
لساي هنا وحدي بأعيش
أعيش حياتي بمن حضر
من ريف بلدنا والحضر
ومن كل حاجة من الحاجات المؤلمة
أخدك في حضني من الخطر
مع إني عمري ماشفتكيش
أيوه بأعيش
والحلم عمري ماردهوش
زي ما يجي أتقبله
زي ما يجي بأسجله
في دفتري والذكريات
مع إني ما بحبش بنات
لكنهم دول مغريين
ودغريين في عشقهم
ومع إني ماعشقتش كتير
لكن دي سيرتي عندهم
ماعرفشى ليه؟!
ما يكنش فاكريني جدع
وقلبي خالي م الوجع
هأضمهم بين ضلوعي
وأطير بعيد عن الزحام اللي ساكن عمرهم
عن الزحام اللي يلخبط وشهم مكياج عجيب
وأنا مش غريب عن عشقهم
وكدبت لما قلت ماعشقتش كتير
لكن الحقيقة عشقتهم
كلهم ،اه كلهم
اجمعوا جوه ملامح ضحكتك
رغم الزحام..
جوه الكلام..
وانتي بتحكي عن شقاهم
وكمان بتحكي ع الانسجام
بتاعهم مع شوية حاجات
وحبهم للف في وسط البلد
علي الفترينات
متزوقين مكياج خفيف
لكني برضو ماشفتكيش
دورت عنك وسطهم
دا حلم متلخبط أكيد
وشىء غريب..
شفتك أنا ،وماشفتكيش
وسط الزحام
أشياء غريبة ماتتحكيش
ووشك ما هوش كالوشوش الموجعة
وشك برىء..
وأنا حلمي زيه بالتمام
يقدرش يحلم في الزحام
محتاج لحضن حبيبته
يبقي على انفراد
