أمّ الصابرين… حكاية قانون الإيجار وتعب السنين
شعر: أشرف أبو عريف
يا سامعين الصوت في ليلٍ طويل
اسمعوا الحكاية من جرحٍ أصيل
قانون قديم من عشرين وميّه
حبس المالك… وادى للمستأجر هديّه
كان الجنيه يفرش بيوت ويزيد
والمالك صابر… والمفتاح بعيد
يجي حفيد وراه ألف جيل
ساكن ببلاش… والمالك عليل
وفي التسعينات اتغيّر الكلام
اللي عايز شقّة يدفع نصّ التمام
مقدّم يوجع وتشطيب كسير
والمستأجر شايل همّه كبير
وجت خمسة وعشرين وقالوا جديد
سوّوا اللي دفع عمره باللي كان سعيد
قالوا كله واحد… كله سواسية
والأسعار نار… والدنيا قاسية
والجنيه غرقان في موج التعويم
والدين نار ساكنة جوّه البيوت مقيم
والعيشة واقفة عالشفا
والمواطن تايه… لا شاف ولا اكتفى
يا نوّاب شعب، يا أهل القرار
ليه دلوقتي؟ وليه الوقت نار؟
هو الزمن ضاق ولا الرؤية خانت؟
ولا الحكاية أكبر… والسِكّة مالت؟
العدل مش ورق ولا بند كتاب
العدل رحمة… مش كسر رقاب
اللي يساوي ظلم بغنيمة مال
ده ميزان مائل… وحُكمه محال
افتحوا للناس باب الاستفتا
يمكن نلاقي حل… والجرح يهدى
يا مصر يا أمّ الصبر الطويل
أمّ الصابرين… ولسّه الأمل جميل
